Psa 6 | KYG | STEP | Ala kava nene, ge ne'nahaugeno'ae'mo kaipamo nelene'mo ge o'nahauvo. Kayo'mo ne'namisanageno'ae'mo kaipamo nelene'mo kayo'mo o'namiyo.

Psalms 6

Hani'ilagamo havae'neno'ae'mo nunumu hu'niya gemae

1 Ala kava nene, ge ne'nahaugeno'ae'mo kaipamo nelene'mo ge o'nahauvo. Kayo'mo ne'namisanageno'ae'mo kaipamo nelene'mo kayo'mo o'namiyo. 2 Lokiya'nimo alagi ohane'niyanagi kahau huka nato. Lokiya'nimo alagi ohane'nige'na atete nehuvanagi halate alika alagepa huka nato. 3 Naipamo'mo lusi kava huno kana hu'niyanageka na magi afina'mo maiteka naha maegane. 4 Ala kava nene, hu'na, aika afe leka nagetekae'mo hatu maeka nato. Falu kaipa vekamo mai'neka kahau huka ne'apatana vekamo falisuva kavategati'mo nagufamo alika katika nato. 5 Fali'naya vaya'mogimo kagaefe'mo apakesamo no'afiye. Kanolufi'mo mai'naya vaya'mogi kagikale'mo ali'a asaga hu'a nokatae. 6 Yulagefa ne'augeno'ae'mo lusi kava huno alaga ne'nahae. Muki hani'ilagamo hipa'nile'mo havae'nogeno'ae'mo naunu ani'mo'mo hipa'nile'mo lami'nigeno'ae'mo lanitani nehiye. 7 Kame vaya'nimo mai'nageno'ae'mo naunumo lami'nigeno naulagamo kosi'nige'na age'na alagepa hu'na no'agove. 8 Avi'ya nehugeno'ae'mo Ala kava ne'mo'a afi'niya'mofe'mo hosu kava'mo nehaya vayanagi nataletapa viyo. 9 Nunumu hu'na aukaya hu'na ge nehugeno'ae'mo afi'niyanageno afa'a naha maegaiye. 10 Naha maesige'apae'mo muki kame vaya'nimo apavagage hisige'a atete hugae. Apavagage hisige'a natale'a ugae.